59. In Purificatione BMV.

1 a. Germinavit radix Iesse,
Virgo mater coepit esse
Peperitque filium;

1b. Novo fructu fecundatur,
Sed non tamen defloratur
Virginale lilium.

2 a. Humanatur verbum patris
Et in sinum missum matris
A superno cardine

2 b. Ad priorem vocat statum
Adam pomo degradatum
Dignitatis omine.

3 a. Virgo parit, virgo manet,
Et ut Deus nostrae sanet
Cicatricis vulnera,

3 b. Terram rigat novo rore
Et infundit novo more
Gedeonis vellera.

4 a. Spina florem procreavit,
Cuius odor recreavit,
Recreando suscitavit

Iam foetentem Lazarum ;

4 b. Virgo regem generavit,
Cuius ortus conturbavit,
Conturbando triumphavit
Et confregit tartarum.

5 a. Rubus quondam salvus igne
Novum signum et insigne
Fuit, de quo fari digne
Transcendit ingenium ;

5 b. Rubus ardet, nec ardoris
Flamma perit decor floris,
Virgo parit nec pudoris
Perdit privilegium.

6 a. Salve, virgo, sed fecunda,
Salve, mater, virgo munda,
Tuos servos a profunda
Libera voragine.

6 b. Via caeli, regis cella,

Porta clausa, maris stella,

Nos a maris duc procella

Et a mundi turbine.

7 a. Iesu bone, spes lapsorum,
Piae matris prece chorum
Istum salva nos caelorum
Ducens ad palatia,

7 b. Ut a iure Pharaonis
Et fornace Babylonis
Salvi tuae visionis
Perfruamur gloria.