63. In Assumptione BMV.

1 a. Laudes claras canticorum
Sacer chorus ante thorum
Moduletur virginis.

1b. Digna valde venerari
Voto, lingua virgo clari
Et praecelsi germinis.

2 a. Cor exsultet, sonent ora,
Sursum voces hac in hora
Levent terrae termini ;

2 b. Caelos flore gratiarum
Colorata variarum

Scandit mater Domini.

3 a. Totus caeli potentatus
Exit illi laureatus
Titulo victoriae;

3 b. Sculptae gemmis fores urbis
Patent, eunt iuncti turbis
Senatores curiae

4 a. Radiantes veste, vultu ;
Novo stupet prae tumultu
Micans auro civitas ;

4 b. Vasis modos sub canoris
Flectit psaltes ; intus, foris
Resonat centenitas

5 a. Angelorum milium
Sonis alludentium ;
Murrae, turis ignibus

5 b. Cellae fumant aetheris;
Filius prae ceteris
Collo matris vultibus

6a. Haerens tenet dexteram:
"Tibi, quam selegeram",
Ait "eeee, copia

6 b. Summi boni" ; singulis
Dignitatum titulis
Pollet finis nescia.

7 a. Pectus gemmis, annulis
Manus, collum circulis,
Lacte, rosis faciem

7 b. Pingit, addit duplicem
Vestem, auro verticem
Cingit, offert requiem.

8 a. Hoc decore supernorum
Clara, felix angelorum
Superfertur ordini,

8b. Ubi laudes indefessi;
Laeti cives hoc professi
Trino canunt numini.

9 a. O quam mira, quam festiva,
O quantorum contentiva
Fulget illa mansio,

9b. Cuius cives, cuius statum,
Cuius nescit apparatum
Vestigare ratio !

10 a. Illic illa, quae mamilla
Pavit regem, iungat gregem
Nostrum ad caelestium.

10b. Ope Christi fulta tristi
Morte reos tollat eos
Caelum usque tertium,

11a. Ut ablutos et exutos

Poena dura, carnis cura,
Solo dono gratiae

11b. Regno donet et coronet
Nos in fine sine fine
Sitos throno gloriae.