64. In Assumptione BMV.

1 a. Ave, regina gloriae,

Splendor caelestis curiae,
Nostrae causa laetitiae,
Salomonis palatium,
Cella virtutum omnium;

R. Eia, mater fidelium,
Ora pro nobis filium,

1b. Vitae via, spes veniae,
Mater misericordiae,
Porta supernae regiae,
Singulare subsidium
Ad te, virgo, clamantium.

R. Eia, mater fidelium,
Ora pro nobis filium.

2 a. Expers virilis seminis,
Sancti repleta flaminis,
Lumen aeterni luminis,

Patremque paris proprium,
Virgo post puerperium.

2 b. Mater mirae dulcedinis,
Per te caelestis culminis
Porta patet, quam hominis
Primaevi clausit vitium ;
Ave, salus credentium.

3 a. Arbor fructus mirabilis,
In te, mater amabilis,
Rabus ardenti similis
Adimplevit mysterium ;
O quam felix praesagium !

3 b. Regina ineffabilis,
Per te fiet placabilis,
Cum iudex quam terribilis
Fulminabit iudicium ;
Ave, nostrum refugium.

4 a. Iesum, Virgo perpetua,
Placa, mater, assidua
Prece, voce melliflua;
Da reis necessarium,
Benigna, patrocinium.

4 b. A cordibus evacua,

Quae animis sunt nocua,
Ut per bona continua,
Eia, mater, consortium
Consequamur caelestium.