66. De Beata Maria ad Nives.

1 a. Pro basilica futura

Nivis sub forma, tu pura,
Locum, virgo, deputas;

1b. Romanos, mater O Christi,
Stupidos plane fecisti,
Hoc facto cum promicas.

2 a. O quam fertilis hic actus,
Per quam sterilis est nactus
Prolem venter feminae,

2 b. Civis Romani uxoris,
Patricii pulchrioris
Novo dato semine!

3 a. Ostenso sibi in loco

Vir praeclarus sub devoto
Corde cunctis inclitam

3 b. Piae matris in honorem
Fundavit sollemniorem
Iohannes basilicam.

4 a. Inde papa, cardinales
Structuras aulae reales
Dedicarunt laetius;

4b. Ueniae papa mox cunctis
Gratiam contulit iunctis
Aulae tunc perfectius.

5 a. Summo dedicata more
Genetricis in honore
Ipsa tunc basilica

5 b. Festum cepit singulare,
Iussit papa proclamare
Voce quod almifica.

6 a. Eia, boni per exemplum,
Vere deitatis templum,
Ars vera sophistica,

6 b. Confer nobis, gemma pura,
Tu flos florum, post haec dura
Dona, mater, mystica.