73. De Beata Maria V.

1 a. Almi regis mater pia,
Dei genetrix Maria,
Sacra virgo virginum,

1b. Tu es stella matutina,
Rosa florens absque spina,
Quae portasti Dominum.

2 a. Tu es virga dedicata,
De radice Iesse nata,
David regis filia ;

2 b. Tu es thalamus ornatus,
Hortus clausus, fons signatus,
Omni plena gratia.

3 a. Tu es, virgo, flagrans rubus
Quondam visus Moysi,

3 b. Qui manebat incombustus
In deserto Sinai.

4 a. Ardet ille, sed non sentit
Ardoris incendia,

4 b. Et tu paris, sed non perdis
Virginis insignia.

5 a. Tu es vellus Gedeonis
Madefactum pluvia,

5 b. Tuque templum Salomonis
Dei plenum gloria.

6 a. Tu es portus atque hortus
Paradisi floribus,

6 b. Tuque rosa speciosa,
Nata in convallibus.

7 a. Tu es virga Aaron,

Tu mater fortis Samson,
Tu es ros, qui in Hermon,
Ac cupressus in Sion ;

7 b. Tu porta Ezechiel,
Ex te lapis Daniel,
Tu es salus Israel,
Genetrix Emanuel.

8 a. Tu superna clara stella,
Paradisi lilium,

8 b. Tu aurora, lux decora,
Ora tuum filium,

9. Ut ad regnum sempiternum
Nobis, pia, tu sis via,
O dulcis, sancta Maria.