74. De Beata Maria V.

1 a. Arens virga, ferens fructum,
Primae matris tollens luctum,
Nobis confer gaudia.

1b. Haec est summi mater Dei,
Quae pudoris virginei
Servat privilegia.

2 a. Ut vitrum solis radio
Non laeditur, nec filio
Matris castimonia.

2b. Decantate omnes ei

Corde, voce, quamvis rei,
Laudes et praeconia.

3 a. Haec est nardus dans odorem,
Cuius odor salvatorem
Traxit ad humilia ;

3b. Fons signatus, clausus hortus,
Ex quo Christus est exortus
Corporis praesentia.

4 a. Flos campi atque lilium
Singulare convallium
Vitae praeminentia,

4b. Humilitate viola,

Mundi contemnens frivola
Virtutis constantia.

5 a. Tu murtus temperantia,
Rosaque patientia,
Oliva clementia.

5 b. Fons hortorum et puteus
Aquae vivae non luteus,
Fluens abundantia.

6 a. Voluptatis paradisus
Libanusque non incisus
Spirans beneficia.

6 b. Cedrus fugans venenata
Haereticorum dogmata
Odoris fraglantia.

7 a. Balsamus et cinnamomum,
Ex te fecit sibi domum
Deus creans omnia.

7 b. Tu civitas refugii,
Spes totius auxilii,
Tu pia potentia.

8 a. Turris, quae nequit deici
A facie inimici,
Diceris, o Maria.

8b. Nunc, virgo venerabilis,
Per te sit excusabilis
Nostra iniustitia,

9 a. Ne nos pro nostro vitio
Deputemur supplicio
Hostis a nequitia,

9 b. Sed gaudiis tecum frui
Nos quaesumus servi tui
Queamus in gloria.