75. De Beata Maria V.

1 a. Ave, Iesu mater pia,
Mundi lumen, o Maria,
Salutis triclinium.

1b. Ave, decus virginale,

De qua Christus singulare
Vitae prodit lilium.

2 a. Tu signatum et sacratum
Vas, politum et conditum
Condimento gratiae.

2 b. Tu superni Salomonis
Thronus, vellus Gedeonis
Es roratum numine.

3 a. Nescit mundus tibi parem,
Nam per palmam singularem
Dei es hospitium.

3 b. Rosa, novum promis florem,
Qui refovet per odorem
Sunamitis filium.

4 a. Tu in caeli curia
Habes privilegia,
Angelorum domina,

Cunctis praestans coetibus.

4 b. Luna praeest omnibus
ln caelo sideribus,
Sic tu praees omnibus
Sub caelo degentibus.

5 a. Ave, virgo lactans prolem,
Stella sinu fovens solem,
Angelorum domina.

5 b. Ave, Iesse germen justum
Fructum terrae dans venustum
Per arcana semina.

6. Nato, mater, nos commenda,
Ut exutos omni menda
Nos locet in gloria.