82. De Beata Maria V.

1 a. In suprema hierarchia
Residenti dominae
Personemus voce pia
Servitutis nomine.

1b. Decet alte sublimatam
Altis coli vocibus,
Huic offerre laudem gratam
Studiis velocibus.

2 a. Haec est illa benedicta
Sub se tenens femina
Lunam, sole praeamicta,
Luce clarens gemina.

2 b. Velut gemmis coronata
Bis senis sideribus,
Cunctis disparet praelata
Sola mulieribus.

3 a. Ave, dulcis mater Dei,
Casti candor lilii,
Ave, nostrae robur spei
Per vallem exsilii.

3 b. In procinctu lapsis viae
Manum nobis porrige
Ac, ne deviemus, pie
Gressus nostros corrige.