85. De Beata Maria V.

1 a. Novis cedunt vetera:
Celant terrae viscera
Caelum celans cetera,
Centrum claudit circulum ;

1b. Vitem nectens hedera
Facta est fructifera,
Dum cepit puerpera
Verbo verbi surculum.

2 a. Sicut solis radius
Penetrat innoxius
Et transit ulterius

Per fenestram vitream,

2 b. Sic, immo subtilius
Intrat et suavius
Transit Dei filius
Per aulam virgineam.

3 a. Lux in testa conditur,
Hinc et rubus cernitur
Ardere nec uritur ;
Dum Mariae gremio

3 b. Caeli lux illabitur,
Virgo nec corrumpitur
Nec in suo laeditur
Mater puerperio.

4 a. In te, plena gratia,
Vestitur camisia
Scissa de substantia
Tuae carnis deitas.

4b. Quis audivit talia?
In te fiunt socia
Haec olim contraria,
Partus et integritas.

5 a. Cella pudicitiae,
In te pax iustitiae
Dedit amicitiae

Exoptatum osculum.

5 b. Nos in pace patriae
Fac, o mater gratiae,
Tecum patrem gloriae
Laudare per saecula.