88. De Beata Maria V.

1 a. Prodit puer de puella
Sana castitatis cella,
Sicut exit lux de stella
Et de sole radius.

1b. Verbum quidem introivit
Atque verbum hinc exivit,
Et sic laetus parturivit
Venter viri nescius.

2 a. Res a saeclis inaudita,
Quod puella parit ita,
Et quod ita sunt unita
Terrestribus caelestia.

2 b. Sic est homo factus Deus,
Ne periret homo reus,
Quod si crederet Iudaeus,
Non esset in miseria.

3 a. Gloriosa mater Dei,
Mater magni Nazarei,
Mater Iesu, nostrae spei,
Mater misericordiae.

3 b. Te precamur, tu precare
Tuum natum nos iuvare,
Fac nos tecum habitare
In paradiso gloriae.