89. De Beata Maria V.

1 a. Salve, caelorum regina,
Salve dulcis, et inclina
Nostris aurem precibus.

Ib. Plena virtute divina,
Salve, salutem propina
Tuis his supplicibus.

2 a. Singulari digna laude,
Sola super omnes gaude
Caeli sedens solio;

2 b. Hostis nostri pulsa fraude
Portas mortis clemens claude,
Mortis laeta spolio.

3 a. Virga de radice Iesse,
Germinasti verum esse,
Deum, Dei filium.

3 b. Mole delictorum pressae
Plebi ne velis deesse,
Sed supple consilium.

4 a. O quam admirabilis,

Quae virgo peperisti!

4 b. O vere laudabilis,

Quae genetrix es Christi !

5 a. O nova genitura,
Tu matris tenes iura
Cum flore puellari ;

5 b. O virgo semper pura,
Te nostra quaerunt iura
Cum laude singulari.

6 a. Salve, salus et salutis
Causa, formam da virtutis
Contra mortis taedium.

6 b. Opera confer destitutis,
Labe peccati pollutis
Reatus remedium.

7 a. Mater Dei dulcis, vale,
Iesse germen triumphale,
Flos caeli, Maria,

7 b. Decus nostrum speciale,
Pulsa peste mortis malae
Tua prece pia.