98. De Omnibus Sanctis.

1 a. Alpha et O nominaris

Tu, qui cunctis dominaris,

Caeli, terrae quoque maris

Plasmator et omnium.

1 b. Hic tibi dies dicatur,

Primum primo melos datur,
Quem factura protestatur
Trinum, unum Dominum.

2 a. Hinc in sanctis hunc laudemus,
Sed prae cunctis exaltemus
Iesu matrem, qua gaudemus
Nostra pelli crimina.

2 b. Lunam calcans, leva pressum,
Sole cincta, firma fessum,
Stellis compta, para gressum
Ad virtutum limina.

3 a. Ierarchiis praesidentes,
Summo regi praecinentes,
Vestras laudes depromentes
A malis defendite.

3 b. Puri, nos purificate,
Clari, nos illuminate,
Sancti, nos perfectos date,
Sic nobis intendite.

4 a. Patres Christum figurantes,
Vates hunc praenuntiantes
Atque viam praeparantes
Eius ante faciem,

4b. Quem venturum sperabatis,
Nunc in caelis conregnatis,
Ut cernamus hunc, tergatis
Nostrae mentis aciem.

5 a. Caeli verbis intonantes,
Claris signis coruscantes,
Gratiam desuper rorantes
Arefactis cordibus,

5 b. Irrigate verbi sata

Vestro dogmate plantata
Cordaque vitiis foedata
Expurgate sordibus.

6 a. Oculati post et ante,
Retro culpae excaecante
Veri solis radiante
L ce, nos eripite.

6 b. Vos gestorum summi regis
Scribae quoque novae legis,
Ut delictis sui gregis
Parcat, intercedite.

7 a. Zelatores mandatorum
Ad instar elephantorum
Ad bella provocatorum,
Vecti mori sanguine;

7 b. Qui pro nobis dimicavit,
Agni cruor vos armavit,
Vestra prece, quos salvavit,
Iuvet in certamine.

8 a. Almi Christi confessores
Et ecclesiae doctores,
Vitiorum evulsores,
Virtutes itiserite;

8 b. Qui fideles exstitistis

In paucis, nunc possedistis
Multa ; quos hic genuistis
Natos, non deserite.

9 a. Virginum uterque sexus
Iunctus per amoris nexus,
Christi dulces ob amplexus
Sprevistis luxum saeculi,

9 b. Nos feratis ad vestrarum
Grata festa nuptiarum,
Ut tersorem lacrimarum
Nostri cernant oculi.