103. De sancto Aegidio.

1 a. Ore, corde, manu puros,
De mercede iam securus
Psallat chorus noster, murus
Fortis contra vitia.

1b. Sunt beati confessoris
Aegidii, oratoris
Veri Dei et cultoris,
Hodie sollemnia.

2 a. Graecus fuit natione,
Constans in oratione,
Facto placens et sermone,
Plenus Dei gratia.

2b. Vere debet venerari
Iste sanctus et amari,
Qui virtutes operari
Coepit ab infantia.

3 a. Puer erat, vestem dedit
Aegro cuidam, salus redit,
Hac accepta morbus cedit
Cum omni molestia.

3 b. Fides eius Deo grata,
Quo volebat, tulit data
Sibi a papa celata
Cupressina ostia.

4 a. Multos aegros liberavit,
Daemoniacos curavit,
Mortuum resuscitavit
Divina potentia.

4b. Gotis dans hilaritatem,
Removens sterilitatem
Terrae dedit ubertatem
Sua per suffragia.

5 a. Quoddam Karoli peccatum,
Regis Franciae, celatum
Est huic sancto revelatum
Angeli praesentia.

5 b. Haec et plura mira facta
Sunt per eum olim acta,
Quae in scriptis sunt redacta
Pro ipsius gloria.

6 a. Nunc in caelis coronatus
Nobis est adiutor datus,
Nam exaudit invocatus
Grata dans auxilia.

6 b. Nos exaudi supplicantes
In hoc festo te laudantes,
Pie pater, et lactantes
Duc ad caeli gaudia,

7. Ubi tecum gloriantes
Canamus Alleluia.