106. De sancto Agilolpho.

1 a. Adest dies laetitiae,
In quo sidus iustitiae
Fulgidum emicuit;

1b. De profundis tenebrarum
Divinitus lumen clarum
Ortum mundo claruit.

2 a. Agilolphus, Deo gratus,
Agrippinae pastor datus,
Inflammatus caelitus,

2 b. Firmans fidem,formans mores,
Legis sacrae perversores
Superavit penitus.

3 a. Hic sanctitatis speculum
Et doctrinae spectaculum,
Vas virtutum omnium,

3 b. Regis consiliarius
Legis et operarius,
Bonus pastor ovium.

4 a. Cum mittitur a Karolo
Pro conservando populo,
Amblanam progreditur ;

4 b. Tunc Raginfridi gentibus
Helpricique crudelibus
Invasus occiditur.

5 a. Sic Christi factus hostia
Caelorum transit ostia,
Cum palma martyrii.

5 b. Aegri currunt et curantur,
Laesi, claudi reparantur
Meritis Agilolphi.

6 a. In tam felici transitu

Columba candidissima
Eius ore processit

6 b. Signans, quod absque gemitu
Anima beatissima
Sic superos accessit.

7 a. Et cruore rubricata

Talis athletae gramina
Servant viriditatem,

7 b. Cuius morte sunt signata
Hodie designantia
Martyris sanctitatem.

8 a. Martyrum gaude contio,
Tali tantoque socio
Innocenter mortuo,

8 b. Quem laudet et devotio
In laudum exercitio
Et concentu mutuo.

9 a. Sexus et gradus populi,

Singulariter clerici,

Mariae Colonia

9 b. Qui ad gradus canonici

Vel Malmundae sunt monachi,
Devota symphonia.

10 a. Eia, pastor noster bone,
Memor sis proprii gregis
Custos et praesidium,

10 b. Pertingamus ut, patrone,
Favore superni regis
Sanctorum fastigium.