108. De sancta Agnete.

1 a. Hodiernae lux diei
Dies est beatae spei
Et salutis animae;

1b. In hac die collaudatur
Agnes virgo, dum locatur
In sanctorum agmine.

2 a. In aetate iuvenili,

Corde tamen iam senili
Mundum fugit penitus;

2 b. Viri thorum detestatur,
Iesum Christum protestatur
Sponsum suum caelitus.

3 a. Propter fidem salvatoris
Denudatur veste foris,
Sed crine contegitur.

3 b. Locum foedum fecit sanctum,
Dum compescens patris planctum
Natus vitae redditur.

4 a. Ignem intrat copiosum,
Populum seditiosum
Flamma crescens concremat.

4b. Orat virgo stans in igne,
Exaudita quidem digne
Vocem laudis concrepat.

5 a. Ferro tandem iugulatur,
Angelorum sociatur
Coetibus in gloria.

5 b. Stant adfines ad sepulcrum,
Vident agnum Dei pulchrum
Praecellentem omnia.

6 a. Chorum cernunt virginalem,
In quo locum specialem
Tenet beatissima.

6 b. Ad reginam currit fama,
A sepulcro redit sana,
Fit christianissima.

7 a. MundumspernitpropterDeum,
Et Agnetis mausoleum
Cumulat honoribus ;

7b. Crescit fides castitatis
Multis secum congregatis
Ibidem sororibus.

8 a. O miranda salvatoris

Et laudanda cunctis horis
Tam mira potentia,

8 b. Per quam Agnes triumphavit,
Mundum quoque illustravit
Felici memoria.

9 a. Omnes ergo gratulemur
Et Agnetem deprecemur
Sic dicentes pariter:

9 b. Agnes, agnum roga Christum,
Ut conservet locum istum
Et defendat iugiter.

10 a. Nosque tua sancta prece
A gehennae salvet nece
Et peccati macula,

10 b. Ut cum ipso simus tecum,
Qui donavit, ut sis secum
Per aeterna saecula.