118. De sancto Alexio.

la. Mund'pompae contemptorem,

Verae doxae dilectorem

Laudemus Alexium,

1b. Paupertatis amatorem,

Castitatis servatorem

Penitus innoxium.

2 a. Hic pauper voluntarius,

Quod bonum nunc est rarius,

Fuit in divitiis ;

2 b. Sed Christo fore carius

In multis evidentius

Patuit prodigiis.

3 a. Esse domi sponsae iunctus

Potuit et iuste functus

Sacro matrimonio ;

3 b. Sacro flamine perunctus

Hanc reliquit, pauper cunctus

Spreto patrimonio.

4 a. Spernens noxia cum Saulo

Vovit licita cum Paulo

Studiose quaerere.

4b. Navem scandit dato naulo,

Ut sic terram sanctam paulo

Posset post invisere.

5 a. Hunc uterque parens plorat,

Et medullitus implorat

Pro salute filii ;

5 b. Sancta sponsa cum his orat,

Cuius mentem dolor forat

Coniugis exsilii.

6 a. Degentem cum pauperibus

Orantem et frequentius

Mentis flexo poplite

6 b. Per novenos uno minus

Annos hunc Edissae sinus

Fovit, urbis Syriae.

7 a. Virum custos non sinebat

Hunc orare, dum volebat,

Semper in ecclesia ;

7 b. Qui, dum laesus sic tacebat,

Illum semel arguebat

Virginis iconia.

8 a. Ab Edissa post recedit,

Vanitati vanae cedit

Tarsum volens petere ;

8 b. Ostiae sed sic accedit

Nutu Dei et procedit

Patris domum visere.

9 a. Hospes factus in propria,

Mundi quaerens opprobria,

Incognitus latebat;

9 b. Caeli terebat atria

Pernoctans in vigilia

Carnemque premebat.

10 a. Migraturus ad aethera

Nomen scribit et munera,

Quae sponsae dereliquit;

10 b. Mortisque solvens foedera,

Invisus scribens opera

Sancta mundum reliquit.

11a. Nolens tamen sic latere

Rex caelorum bunc patere

Voce fecit caelica,

11b. Quae papam et reges vere

Provocavit hunc videre

Suavitate melica.

12 a. Quem inventum venerantur,

Cartam legunt et scrutantur,

Quae vir Dei scripserat;

12 b. Sed parentes lamentantur

Et pro nato cruciantur,

Sponsa crines lacerat.

13 a. Tumulatus cum honore

Planctus fugat cum dolore;

Templo Bonifatii

13 b. Martyris laudatur ore,

Cunctorum replens odore

Patriam solacii.

14 a. Caecus videt, mutus fatur,

Surdus audit et laetatur

Tuis sanctis precibus,

14b. O Alexi, venerantur

Qui te, fac, ut decernantur

Cum beatis omnibus.