115. De sancto Andrea.

1. Pater summe,

2 a. Praeconia

reddimus tibi debita,

2 b. Ut valeant

eadem fore placita.

3 a. Est namque dignum,

ut lauderis

ab ecclesia,

3 b. Pro qua cruoris

effusa sunt

sacra flumina.

4 a. Tu quippe scelera

eius lavisti maligna,

4b. Quae erat squalida

ante baptismata sacra.

5 a. Talibus pro pietatis

donis reddit vota

5 b. Et supra stellarum loca

dirigit cantica,

6 a. Quibus poscit

tuam adipisci

misericordiam.

6 b. Una, sancta

trinitas, relaxa

nostra facinora

7. Andreae sancti sacra

per merita.

1 a. Exsultantes concinamus

Triformi concordia,

1b. Plausu mentis, oris, vocis

Andreae praeconia.

2 a. Hic virilis nuncupatus,

Piscens, hamans est hamatus,

Captus hamo gratiae.

2 b. Nam dum rete ducebatur,

Pisces trahens trahebatur

Ad doctrinam gloriae.

3 a. Fit piscator

Novus pastor,

Sequens regem

Quaerit gregem,

Quem errantem didicit.

3 b. Hic non iustus

Factus iustus

Reddit sanos,

Quos non sanos

Resanandos conspicit.

4 a. Lex invito suffragatur,

Lumen caeco reparatur,

Ac de morte suscitatur

Natus ex Demetrio.

4 b. Matris pudor incitatur,

Christi fides augmentatur,

Stat in cena, reformatur

Fugato daemonio.

5 a. Mirantur hunc Byzantium,

Philippi, Nicomedia,

Mare, litus, navigium,

Macedones, Achaia;

5 b. Et confines admirantur

Aegris salute reddita,

Gaudent cuncti, gloriantur

Vita defunctis praestita.

6 a. Dum Marmedon gens vesana

Servos Dei cibum quaerit,

Christo nata via plana

Moriturus vitam gerit

Custodum exitio.

6 b. Dum dissolvit, hic ligatur

Catenatis substitutus,

Poenam demens poenae datur

Volens, in agone tutus

Christi ministerio.

7 a. Duri gente,

Duri mente

Dure castigantur

Eorum nequitia.

7 b. Mira poena,

Mira vena,

Mire suffocantur

Spreta Dei gratia.

8 a. Patras, finis victoriae,

Parat coronam gloriae,

Dum docet, dum recluditur,

Dum cruci vinctus figitur.

8 b. Nam pendens Dei nuntius

Turbas docet instantius;

Rogant omnesproconsulem,

Ut reddat eis praesulem.

9 a. Crucis triumphus quaeritur,

Nec se deponi patitur,

Sed vita in hac redditur

Magistri per mysteria.

9 b. Corpus almum diligitur,

Per Maximillam tollitur,

Terrae conditum traditur

Odorum cum fragrantia.

9 c. Aegeathas arripitur,

Praecipitatus moritur,

Frater ad fidem ducitur

Spreta eius perfidia.

10 a. O Andrea, frons herilis,

Sancte pater et virilis,

Sis nobis ad veniam ;

10 b. Nobis esto suffragator,

Dux, lux, via, sustentator

Ad aeternam patriam.