121. De ss. Ansano, Savino, Crescentio, Victore.

1 a. Cum ingenti iubilo

Canticum eructet

Devotoque modulo

Coetui decantet

Sanctorum, radiolo

Sena quo relucet.

1b. Ansano christicolae

Primo melodia,

Senarum agricolae

Iussione dia,

Metrum honorabile

Det votaque pia.

2 a. Tibi grates reddimus,

Inclite patrone,

Nam, per te qui credimus,

Dabuntur coronae,

Bona si egerimus,

In caeli balcone.

2b. Exempli mirifici

Vigilem pastorem,

Savinum, veridici

Sermonis doctorem,

Honoret dominici

Gregis bellatorem.

3 a. Savine doctissime,

Tribue doctrinam

Vitandi cautissime

Mundanam ruinam,

Servandi tutissime

Fidei carinam.

3 b. Sit memor martyrii

Pueri beati

Undeni Crescentii,

Urbe alma nati,

Pro poenis supplicii

Caelo coronati.

4 a. Te, quem novo ordine

Misit Deus Senas.

Precamur hoc carmine,

Aufer nobis poenas,

Crescenti, cum lumine

Gratiae da venas.

4 b. Militis fortissimas

Siculi Victoris

Poenas inclitissimas

Penset corde, choris,

Quas tulit asperrimas

Zelo creatoris.

5 a. Largire potentiam,

Victor, ut serpentis

Possimus proterviam

Delere mordentis,

Qui ad tis custodiam

Sumus defendentis.

5 b. Summa Dei bonitas

Laude veneretur,

Qua quaterna sanctitas

Senis retinetur,

Ut eius auctoritas

Semper invocetur.