124. De sancto Antonio.

1 a. Psallat voce laetabunda,
Solvat odas manu munda
Sacra cleri contio;

1 b. Plebs Minorum astans laeta,
Laudans absque laudis meta
Iubilet Antonio.

2 a. Ex Hispanis stella micat,
Cuius mundi lux extricat
Erroris phantasticum.

2b. Arca legi consecratur,
Intus foris deauratur,
Manna spirat mysticum.

3 a. Crucifixi verax testis

Mutat ritum victus, vestis
Sub Francisci regula

3b. In armatum ruit fortem,
Ut pro morte reddat mortem,
Ensi parat iugula.

4 a. Audax praeco veritatis
Non personae, non aetatis
Demulcetur gratia;

4b. Aequae lancis pauper, dives,
Peregrini, sive cives,
Plectuntur sententia.

5 a. Surdus, mutus, claudus, caecus,
Epilensis, latro, maechus
Vim virtutis sentiunt;

5 b. Morbi, pestes et, quae restant,
Argumenta laudis praestant,
Dum pulsa diffugiunt.

6 a. Eia, pater supplicantum,
Audi vota, cerne planctum,
Nos ad chorum duc cantantum
In excelsis Gloria.

6 b. Quo sequamur iuncti spei
Et in domo requiei
Collocemur dono Dei;
Amen dicant omnia.