125. De sancto Antonio.

1 a. Olim mundo minoratus,
In supernis coronatus
Exsultat Antonius.

1b. Cur quaeruntur hic honores?
En, honorum contemptores
Honorantur amplius.

2 a. Spretis mundi blandimentis
Hic in manu blandientis
Maechae liquit pallium ;

2 b. Se denudans vestimentis
Parvipendit illudentis
Nihil improperium.

3 a. Augustini tenens normam,
Post vivendi mutans formam,
Ad Minores transiit;

3 b. Sub Francisco patre degens
Et pro Christo factus egens
Caelum dives adiit.

4 a. Intus Deo parans templum,
Foris formam et exemplum
Dedit sanctimoniae,

4b. Dans virtutum viam, morum,
Victor fuit vitiorum,
Carnis, paenitentiae.

5 a. Hic superni praeco regis
Tuba tonans novae legis
Flagrabat ut facula;

5 b. Magnos monet et pusillos
Non palpando hos vel illos,
Aeque librans singula.

6 a. Caeci vident, muti fantur,

Et defuncti suscitantur

Per ipsius merita.

6b. Maris sedat tempestates,
Aegris praestat sanitates
Redditque deperdita.

7 a. O Antoni, flos Minorum,
Miserere miserorum,
Nos de caelis respice.

7 b. Da triumphum vitiorum
Et in via mandatorum
Gressus nostros perfice.