137. De sancta Barbara.

1 a. Virgo mitis, generosa,
Gemma caeli pretiosa,
Sponsa Christi speciosa,
Dioscori filia.

1b. Tecum, virgo, lapis volat,
Ut sic tuus pater colat
Trinitatem, quem violat
Haeresis ludibria.

2 a. Christus eam visitavit
Et in vinclis confortavit,
Plagas eius mox sanavit,
Sana refert gratias.

2 b. Veste caeli sibi data
Migrat virgo haec beata
Sicque patris decollata
Manus sensit impias.

3 a. Ave, proles creatoris,
Ave, sponsa redemptoris,
Salve, serva salvatoris,
Angelorum nuntia.

3 b. Supplicat nunc chorus iste
Per Barbaram, pie Christe,
Irasci nobis desiste,
Qui es vera venia.