144. De sancto Benedicto.

1 a. Pater sanctus Benedictus
Christi pugil fit invictus,
Fulsit signis variis ;

1b. Hostes fregit, mundum sprevit
Carnis labem hic subegit
Virtutum potentiis.

2 a. Hic fit rutilans lucerna,
Luce succensus superna
Lucis spargens radios.

2 b. Dum per sanctae vitae mores
Bonos facit meliores
Et informat alios.

3 a. Hic idola destruit,
Fidem rectam instruit
Christum praedicando.

3b. Vir fuit propheticus,
Totus evangelicus
Proximos amando.

4 a. Hic est lator novae legis,
Fidus ductor Christi gregis
Ad caeleste horreum.

4 b. Hic est alter Elisaeus,
Propter cuius preces Deus
Auxit fratrum oleum.

5 a. De profundo ferrum mersum

Eius iussu est reversum,

Visu solvit vincula.

5b. Vas confregit signo crucis,
Quo in mortem sui ducis
Grex ferebat pocula.

6 a. Vas confractum solidavit

Corque fratris denudavit

Producens in lucidum.

6b. Dum oboedit Maurus patri,
Super undas plantis Petri
Currens traxit Placidum.

7 a. Super saxum vitrum iactum
Est levatum sed non fractum,
Petra fundit fluvium.

7 b. Membra fratris sanat fracta,

Christo pia prece facta

Patri reddit filium.

8 a. Aegros multos qui sanasti
Mortuosque suscitasti
Tua prece,

8 b. Animarum nunc languores
Sana, pater, rege mores,
Purga faece.

9 a. Pro quo decertasti pridem,
Nunc coniunctus es eidem
In caelesti patria.

9 b. Post te trahe tuum gregem,
Ut videntes tecum regem
Perfruamur gloria.