175. De sancta Domitilla.

1. Gaude, columba simplicis
Prudentiae, vestita purpuris.

2 a. Tu es virgo gloriosa,
Domitilla speciosa,
Paradisi fulgens viola.

2 b. Te convertit Achilleus,
Te confortat et Nereus,
Ut contemnas sponsum mortalem.

3 a. Dum tu purpuris te vestis
Ornatis gemmis, auro textis,
A sanctis Dei praedicaris:

3 b. Quanto studio ornaris,
In his vanis delectaris,
Ut placeas proli consulis !

4 a. Animam si tu ornares

Et sponsum mundi refutares,
Possideres Dei filium.

4b. "Utinam, tu respondisti,
"Doctrina, quam docuisti,
Olim ad memet pervenisset" !

5 a. Te velavit Clemens sanctus,
Benedixit pastor tantus
Ad tuum pergens palatium,

5 b. Stella fulgens, Domitilla,
Rosa vernans et scintilla
In caelesti arundineto.

6 a. Romam exis, Domitilla,
Ut servilis et ancilla
Propter virginalem gloriam ;

6 b. Exsulans peregrinaris,
In insula sancta moraris
Pontiana dilecta maris.

7 a, Caecis reddis lumen verum,
Cruce mutis verbum merum,
Terracina evangelizans.

7b. Virgines tu convertisti,
Sponsas sanctas velavisti
Et es lucrata sponsas Christo.

8 a. Multitudo paganorum

Sumit legem christianorum,
Qui per te a Roma venerant.

8 b. Persecutor induratur,

Saltans sponsus strangulatur
Et subito cadens moritur.

9 a. Cum virginibus sacratis
In cubiculo firmatis
Per ignem transis ad gaudia.

9b. O beata virgo Dei,
Hodie sis memor mei,
Ut et tecum Iesu gaudeam.