187. De sancto Evurtio.

1 a. Venit sanctus spiritus
Adducens divinitus
De Roma Evurtium;

1 b. Venit pater pauperum
Odiosum veterum
Terminans exitium.

2 a. Consolator optime,
Praesul beatissime,
Urbis desiderium,

2 b. Animae datur quies,
Quae per singulos dies
Linquit purgatorium.

3 a. O lux beatissima,
Qua fruitur anima

Post poenae suspirium;

3 b. Mundata a crimine
Exit de voragine
Per Dei imperium.

4 a. Mundat, quod est sordidum,
Fugat, quod est horridum,
Turpe facit candidum;

4 b. Verbum Dei validum
Per praelatum providum
Confortat, cor pavidum.

5 a. Da viris fidelibus,
Dei servitoribus,

Robur constans cordium,

5 b. Da virtutis meritum,
Religionis ritum

Ac perenne gaudium.