190. De sancto Florentio.

1. Sacerdotum praefulgens gloria
Florentius eximia,

2 a. Scoto natus stemmate
Finibus Alsatiae
Floruit sub praesule
Arbogasto,

2 b. Sexaginta fortium
Gerens se praecipuum
Salomonis astantium
Lecti strato.

3 a. Hic est nubes, vox in rota,
Hic columna et immota
Stans in templo Domini.

3 b. Hic meretur non superbis
Gestis ferre, solis verbis,
Aegrotis remedia.

4 a. Stupescit bestia
Ad huius imperia,

4b. Naturae suae ius
Perdit solis radius.

5 a. O praesul, o confessor,
o cultor Domini,
eius crucem baiulans;

5 b. Tu quadrigas Aminadab
ferens, nobis impetra
posse sequi, quod praedicas.

6 a. O Florenti, florens vita,
Flumen fundens documenta,
Tu sanctorum flores morum
Sensu nostro germina ;

6 b. Interventu tuo Christi
Dona, quae promeruisti,
Futurorumque bonorum
Nobis confer gaudia;

7. Ibi Christo gloria.