191. De sancto Foillano.

1. Adest nobis

dies ista

celebris atque iucunda,

2 a. In qua praesul

martyrque

Foillanus

carne deposita

caelesti indutus

est gloria.

2 b. Meritorum

praemia

assecutus

iam super aethera

sanctorum sortitus

collegia.

3 a. Hic Christo devotus

a pueritia

regalia deseruit

patrimonia.

8 b. Vagus hinc divino

nutu per maria

renuntiavit patriae

factus advena.

4 a. Hunc a cunis

fovit Hibernia,

occiduorum insula,

post et ipsa

ab eo fota

spiritualis escae copia.

4 b. Imitantem

hunc apostolica

pio nisu vestigia

sicut pacis

evangelistam

excepit feliciter Gallia.

5 a. Plures enim huius

praeconio

sunt imbuti vitae

documentis

Dei operante gratia.

5 b. Tam quoque virtutum

ornamento

quam materiali

incremento

compta mater est ecclesia.

6 a. O quam gloriosa

vitae viri merita I

6 b. O quam pretiosa

viri necis gloria !

7 a. Sinceris praeco moribus

in vita clarus nituit

ac clarior a morte

resplenduit

per quam plura

miraculorum prodigia:

7 b. Inter quae eius passio

columba, sanctitas angelo,

corporis absconsio

columna sunt

consignata

trini numinis gratia.

8 a. Ergo cuius est pietas

tanti patris

nos amplecti

pignora,

sit et ipsius gratia

nos eius mereri

patrocinia.

8 b. Et tu, caelestis accola,

cuius festa

celebramus

annua,

tibi devotos adiuva

nosque Christo benigne

concilia,

9. In quo nobis per te

sint festiva gaudia.