195. De sancto Gallo.

1. Concentu parili
hic te, patrone,
veneratur populus
teque piis colit cordibus.

2 a. Generosi Abrahae
fidem secutus,
deserens propria,
effectus hinc
caelestis incola.

2 b. Sanctitate corporis
castitateque
morum prae omnibus
insignitus,
tu decus abbatum.

3 a. Laetare, pater, nobili
genitus prosapia
velut gemmula
nobilissima, auream
accersisti coronam Dei.

3 b. In cuius sacratissimo
corpore insignita
per catenulam
evidentius aeneam
claruere Christi stigmata.

4 a. Te virga Domini
sanat, purgat, erudit
disciplinae spiritu
tamquam pater filium
febre valida.

4b. Tu porta gentibus
ad vitam, idolatriae
cultum delens, populos
Christo novos generans,
doctor optime.

5 a. Sed tu tamen,

pater virtutum, dum nobis
exemplum
humilitatis verae
commendasti, strenue
regem secutus gloriae.

5 b. Ad templumque

mundi cordis tecum Christus

cenaudo

subintrat, praeparando

tibi cenam pinguem

mentisque iuge convivium.

6 a. Laetare, quem scrutator
cordis et renum (Deus)
novit, fovit gratia
spiritaliter
cor replens et animam.

6 b. Exsulta, cui mundus
non risit, daemon
siluit, caro pressa
[fuit] iugiter
suavi iugo Domini.

7 a. Ergo quique colimus
festa famuli Christi,
beati Galli,
eius piis nos iunge
meritis.

7 b. Si non Dei possumus
tantam exsequi tardi
humilitatem,
forma sit nobis pater
humilis.

8 a. Laus patri gloriae,
qui suum famulum
idoneum gentibus
doctorem destinavit
caelitus.

8 b. Laus eius filio,
qui suo sanguine
nos patri (re)concilians
supernis hunc adiunxit
civibus.

9. Laus quoque sancto spiritui
sit per aevum.