205. De sancto Hieronymo.

1 a. Hieronyme sanctissime,

Tua festa nunc colimus,
Precamur, beatissime,
Intende nostris precibus.

1b. Hieronyme, par angelis,
Excelsior hominibus,
Apostolis consimilis,
Ardens Iesu dulcoribus.

2 a. Devote pater virginum,
Hieronyme beatissime,
Amator sancte pauperum,
Assis nobis piissime.

2 b. O sacerdotum gloria,

Virgo Christi, Hieronyme,
Per mundi fulget climata
Tua doctrina hodie.

3 a. Tu norma, forma virginum,
Tu sanctitatis gloria,
Tu monachorum omnium
Via, doctrinae semita.

3 b. Christi devote servule,
Iesu sacerdos inclite,
Ardens amator patriae,
Succurre nobis hodie.

4 a. Funde preces, Hieronyme,

Ad summum patremluminum,
Ut nos purget a crimine
Et tollat hoc incendium.

4b. O eremita, gloriae

Caelestis fruens gratia,
Tu vivens inter homines
Divina potas flumina.

5 a. Te lux divina inebriat,

Caelorum cibo pasceris,
Hieronyme, te satiat

Christus, quemsemper conspicis.

5 b. Quo maior fuit caritas
Et fortior dilectio,
Eo tu gloriosior

Es caelesti consortio.

6 a. O Christi ardens Seraphim,
Hieronyme sanctissime,
O lucens [quo]que Cherubim
Aeternae sapientiae.

6 b. O sancte virgo virginum,
Gloriose Hieronyme,
O confessorum omnium
Et martyrum sanctissime.

7 a. Te quaeso, pater unice,
O beate Hieronyme,
Ad te clamantes aspice
Et mala peste protege.

7 b. Ad te devoti currimus,
O sanctitatis vasculum,
Hieronyme, te quaesumus,
Affer nobis subsidium.

8 a. O [tu] devote servule,

Doctor legis. Hieronyme,
Adesto nunc piissime
Nobis, tu pater optime.

8 b. In sanctorum splendoribus
Uni Deo sit gloria,
Qui Hieronymi precibus
Det nobis caeli gaudia.