216. In decollatione s. Iohannis Baptistae.

1 a. In deserto vox clamantis
Viam verbi demonstrantis
Veneratur hodie.

1b. Opem cuius imploramus,
Ipsi voces extollamus
Cantico laetitiae.

2 a. Hunc, cum sponsi sit amicus
Plus quam vates, rex iniquus
Mancipat custodiae.

2b. A profano religatur,

Dum incestum exsecratur
Coniugis nefariae.

3 a. Necis virus scortum struit,
Lictor ferit, insons ruit
Culpae carens carie.

3 b. Novae dapes cruentatae
Mensis disco sunt allatae
Ministrante rabie.

4 a. En, caelestis a scelesto
Sic occumbit et funesto,
Praeco cedit gratiae.

4 b. Saevit furor, ius turbatur,
Non est, qui compatiatur
Iusto vel iustitiae.

5 a. Beat sanctum trinus fructus,
Transit clamor atque luctus
Praesentis miseriae.

5 b. Apud ipsum, quo beatus
Gustans gaudet laureatus
Sit precator veniae.