223. De sancto Karolo Magno.

1 a. In Karoli magni laude
Voce, voto, manu plaude
Regalis ecclesia ;

1. Pium lauda confessorem,
Legis Dei defensorem
Celebri melodia.

2 a. Imperator Romanorum
Exstitit et rex Francorum
Dei providentia.

2 b. Ecclesiam sublimavit,
Hanc adiutus gubernavit
Divina potentia.

3 a. Hispaniam subiugavit
Sicut gigas et fugavit
Cultum idolatriae.

3 b. Saxoniam debellavit
Et ad fidem revocavit
Idolatras patriae.

4 a. Matri Christi fecit aedem,
Regni sedem et heredem
In magnificentia,

4b. Quam a papa consecratam
Sui facit decoratam
Corporis praesentia.

5 a. Post hoc regnum temporale
Regnum capit immortale
Cum sanctis in patria.

5 b. Hoc imploret princeps iste,
Ut regnare tecum, Christe,
Possimus in gloria.

6 a. Amen dicat iste chorus,
Ut corona sit decorus
In caelesti curia.

6 b. Chorus iste dicat Amen,
Ut iucundum post examen
Decantet Alleluia.