228. De sancta Katharina.

1 a. Iesu regi

caelestis curia

Novas cantat

laudes in gloria

Katharinae

data victoria

De tyranno,

et nunc ecclesia

Gratulatur.

1 b. Haec regali

orta progenie

Regem quaerit

in regni culmine

Sibi sponsum,

ut eius flamine

Vincat, sponsus

tali certamine

Delectatur.

2 a. Eruditur

sub annis teneris,

Mores capit

simul cum literis

Et doctorum

surgit in numeris

Ac amore

divini muneris

Haec fulcitur.

2b. Hanc exornat

decora facies

Nec non tota

corporis species,

Et virtutum

simul congeries

Huc accedit,

haec eis requies

Invenitur.

3 a. Rex libans diis

hanc admiratur,

Quae sic prudens ter

id detestatur ;

Se conclusurum

illam minatur

Philosophorum

ope, sed datur

Virtus blanda.

3 b. Syllogizatur

haec confidenter,

Argumentatur

sic sapienter,

Quod hi pro Christo

ignem ardenter

Ferunt, servantur

vestes potenter,

Res miranda.

4 a. Spernit opes,

blandiri non curat,

Oblato sceptro

aures obturat;

Rex flagella

inferre maturat,

Sed prudens virgo

constanter durat

Nec mutatur.

4b. Iussu regis

sancta compeditur,

Ne escam sumat,

haec custoditur,

Certis diebus

sed et largitur

Cibum columba,

ex quo nutritur

Et firmatur.

5 a. Adnuit custos

munere ductus,

Nocte Porphyri-

us est inductus

Et regis uxor,

sic omnis luctus

Cessat, propinat

haec virgo fructus,

Quos mirantur.

5 b. Hic lux in nocte

fulget caelestis,

Odor suavis

spirat modestis,

Credunt et gaudent

pulsis fun estis,

Cum his ducenti,

qui cum honestis

Deputantur.

6 a. Iam impletis

his diebus senis

Se adesse

promittit in poenis

Iesus, locis

post scandit amoenis,

Videt virgo

oculis serenis

Ascendentem.

6 b. Gaudet sancta,

rex est in furore,

Katharina

rotarum stridore

Non terretur,

angelus fragore

Frangit rotas,

perdit in terrore

Pravam gentem.

7 a. Regem uxor

viso prodigio

Detestatur,

rex cum suspirio

Mammas tolli

iubet martyrio,

Ferro caput,

sic Dei filio

Copulatur.

7b. Reddit arma

regi Porphyrius

Et ducenti

et copiosius,

Ut triumphent,

quos rex maturius

Mori iubet ;

vita in melius

Commutatur.

8 a. His occisis

sanctam decollari

Iubet nequam ;

virgo singulari

Dono potest

cunctis prosperari,

Dei voce

illam praestolari

Confitemur.

8 b. Lac emanat

cervice praecisa,

Corpus fertur

in tumba excisa

Sina monte,

hic membra elisa

Sanat liquor,

regna sunt gavisa,

Gratulemur.