237. De sancto Laurentio.

1 a. Inflammemur ad agonem
Contractantes passionem
Invicti Laurentii.

1 b. Nos ad palmam praeparemus,
Ut in ipso properemus
Ad agrum martyrii.

2 a. In hoc agro laureatus

Stat hic martyr et paratus
Ad mortis supplicium.

2b. Dispersisse confitetur

Se thesauros, dum torquetur,
In manus egentium.

3 a. Ignis intus ignem foris
Et tyrannum vis amoris
Vincit in Laurentio.

3 b. Gratulatur, dum assatur,
Dum crematur, exaltatur
Ab iniquo Decio.

4 a. Bonum opus operatur,

Dum per ipsum illustratur
Caecitas gentilium.

4b. Cuius nox non obscuratur,
Sed in lucem exaltatur
Tam pollens martyrium.

5 a. Ergo, Christe, qui tantorum
Extinxisti tormentorum
Flammas et incendia,

5 b. Tu nostrorum delictorum
Dele culpas ac caelorum
Transfer ad palatia.