243. De sancto Luthardo.

1 a. Hymnizare Deo gaude,
Plebs unita Dei laude,
Per devota studia;

1b. Corde, voce, voto plaude,
Quidquid in se valent, aude
Cor et linguae munia.

2 a. Vere passim sunt laudanda,
Veneranda, praedicanda
Dei beneficia:

2 b. De cuius triumphat dono
In terris, in caeli throno
Luthardi militia.

3 a. Hic est palmes verae vitis
Pretiosa, margaritis
Annulum ecclesiae

3 b. Virtutibus adornavit,

Dum caelestem comparavit
Censum studens latriae.

4 a. Mundo dives in aspectu,
Deo pauper in affectu:
Nobilitas humilis;

4b, Quanto sese deprimebat,
Tanto magis elucebat
Humilitas nobilis.

5 a. O corsanctum, corpraeclarum,
Cor, quod rerum terrenarum
Non infecit copia!

5 b. Alma mens est contemplata;
Quam divina, quam beata
Spiritus inopia I

6 a. Fide grandem, spe securum,
Gestis, vita, corde purum
Summa sanxit caritas;

6 b. Hunc fundavit sibi murum
Tempestati non cessurum
Veritatis firmitas.

7 a. Hic minister caritatis
Post huius mortalitatis
Aerumnosum stadium

7 b. Est adeptus cum beatis

Ad vitam praedestinatis

Summi boni bravium.

8 a. Indevicte miles Christi,
Posce nos ex orbe tristi
Caeli regnis inseri,

8 b. Ut consortes tuae sortis
Et a poenis et a portis
Eruamur inferi.