246. De sancta Margareta.

1 a. Psallat omnis ecclesia,

Iucundetur et sit laeta,

1b. In qua martyr sanctissima
Mundum vicit Margareta.

2 a. Cuius fidem, cuius vota
Nec praefectus nec plebs tota
Depravare potuit.

2 b. Tuncsuspensa,tuncconstricta,
Virgis caesa nec devicta,
Quam Christus sustinuit.

3 a. Draco stupet, daemon stridet,
Quos convincens virgo ridet
Confortata caelitus,

3 b. Flammis, aquis cruciatur,
Sed patenter laureatur
Dono sancti spiritus.

4 a. Viso signo tantae rei
Plebs adclamat laudes ei,
Quinque credunt milia;

4 b. Mox in morte sunt addicti,
Sed pro fide stant invicti
Spreta mundi gloria.

5 a. Tunc ab hoste mors dictatur
In puellam, quod caedatur
Gladii discrimine.

5 b. Dum cervicem flectit illa,
Ferit hic, et lactis stilla
Defluxit cum sanguine.

6 a. Sic despecto mundi flore
Stolam lavans in cruore,
Iam respirans in decore
Martyr caelos penetrat.

6 b. In conspectu summi Dei
Sedem nacta requiei,
Pro salute omnis rei,
Quidquid petit, impetrat.

7 a. Luce gaudet in superna,
Cuius ardens hic lucerna
Lumen dedit fidei,

7 b. Spe subnixa deitatis,
Igne flagrans caritatis,
Satis habens olei.

8 a. Ergo, martyr Margareta,
Fac, ut triplex haec dieta
Metam firmet gratiae,

8b. Fac in nobis veram fidem,
Quod cepisti, confer idem
Bravium laetitiae.