257. De sancto Matthaeo.

1 a. Nova dies est allata,
Quae aurora piis data
Tota clara redditur,

1 b. Nam Matthaeus, vir insignis,
In hac die cum immensis
Laudibus extollitur,

2 a. Hic a Christo praedilectus,
A teloneo vocatus

Surgens sprevit omnia,

2 b. In apostolum assumptus
Dei fonte est potatus
Hausta sapientia.

3 a. Sumpta verbi potestate

Iesu Christi longe, late

Diffundit praeconium

3 b. Et fraterna pro salute
Dei motus a virtute
Scribit evangelium.

4 a. Aethiopiam ingressus

Duos magos est adgressus
Colentes daemonium,

4b. Tandem cursu consummato
Et agone iam peracto
Transiit ad Dominum.

5 a. Plura possent reperiri
Mira facta sancti viri,
Quibus clare demonstratur,
Quam clarus habeatur.

5 b. Sed praesentem iuvet chorum.
Ut in regno beatorum
Regem videns tam decorum
Semper sic glorietur.

6 a. O Matthaee, clara gemma,
Motas carnis nostrae doma
Precum efficacia,

6b. Ut in Christo, vera vite,
Radicati verae vitae
Capiamus praemia.