259. De sancto Mauritio.

1 a. Christo laudes exsolvamus

Et devote recolamus

Christi beneficia.

1. Nihil deest in effectu,
Cum abundat in affectu
Laudum dives hostia.

2 a. Omnes ergo gratulemur
Et praesentis veneremur
Diei sollemnia,

2 b. Quam Thebaeae legionis
Victis poenis passionis
Consecrant martyria.

3 a. O quam dulcis spes piorum,
O quam felix [mors] sanctorum,
O quam vita melior,

3 b. Auro, gemmis, ornamentis,
Cunctis mundi blandimentis
Longe pretiosior!

4 a. Hoc beata legio
Sub duce Mauritio
Sua morte docuit;

4 b. Argumentum utile,
Exemplum laudabile,
Quod morti non defuit.

5 a. Maximiani Caesaris
egressa sententia
Proponit militibus
foeda sacrificia;

5 b. Ergo sacris sculptilium
polluuntur miseri,
Tura ponunt, supplicant
saxo, ligno, lateri.

6 a. Sed declinant a mandatis
Exsecrandae potestatis
Summi regis acies;

6 b. Ad Agaunum fit secessus,

Ubi grata se recessus

Obtulit planities.

7 a. Audit Caesar legionem
Praetergressam sanctionem
Decretalis regii:

7 b. Temptat mentes immutare,
Sed non norant fluctuare
Firmitatis filii.

8 a. Et contempto verbo regis
Decimatur sancti gregis
Tam lata possessio;

8 b. Poenas tulit saevae mortis,
Quem invenit dirae sortis
Facta revolutio.

9 a. Revocantur iterum

Ad ministrum scelerum,
Ad regem nequitiae
Caelestis militiae
Castra beatissima.

9 b. Sed mandatum spernitur,
Et statim recurritur
Ad prius flagitium,
Rursus sentit gladium
Legionis decima.

10 a. Revocantur nec vincuntur,
Sed, quo magis impelluntur,
Maiori stant pondere.

10 b. Ergo cunctos mors involvit,
Sed, ut verum loquar, solvit
Ut vinctos de carcere.

11a. Gens peracto scelere
In sanctorum funere
Ut potens in opere
Celebrat convivium.

11b. O quis locus epulis,
Dum strages in oculis
Dum sanguis in poculis,
Quid vel quale gaudium !

12 a. Victor viae lege ductus

Audit voces sed non luctus,
Ubi luctus ratio ;

12 b. Invitatur, sed professus

Christi nomen est ingressus
Mortem pro convivio.

13 a. O beatae legionis

Venerandi principes,
O felicis passionis
Electi participes,
Exaudite supplices
Impetrate veniam.

13 b. Prosit nobis, speciali

Cum vos laude colimus,
Cum affectu speciali
Nos vobis subicimus,
Et nunc per vos petimus
Sempiternam gloriam.