260. De s. Mauritio et Sociis.

1 a. Laudes Christo decantemus
Et in Christo personemus
Martyrum sollemnia,

1b. Qui vicerunt vim maligni,
Vivunt Deo, Deo digni
Sacra per martyria.

2 a. Messis multa trituratur,
Et matura iam calcatur
Electorum vinea,

2 b. Decimati decimantur,
Ut probati conscribantur
In caelesti linea.

3 a. Testes Dei
Quasi rei
Moriuntur,
Inseruntur

Sempiterno lumini.

3b. Mors eorum
Mors sanctorum,
Gloriosa,
Pretiosa

In conspectu Domini.

4 a. Hic ingressus,
Hic progressus,
Via iusta
Sed angusta

Per cruorem roseum ;

4 b. Christus ipsam
Suis istam
Revelavit,
Commendavit

Per velamen carneum.

5 a. Veri Christi milites
Christi ferunt limites,
Agni tincti sanguine
Rubent, fontis lumine
Christo consignati.

5 b. Plagis gaudent variis,
Colla flectunt gladiis,
Gazas fundunt optimas,
Deo reddunt animas
Fide coronati.

6 a. O Mauriti, princeps alme,
Fulgens fulges instar palmae
In conspectu gloriae;

6 b. Exsuperi, superasti
Mundi luxus et calcasti
Virtute constantiae.

7 a. Super nivem Candide
Dealbans candide
Lilii candore.

7 b. Victor vincit fortius,
Rubet Innocentius
Rubeo cruore.

8 a. Fermentum hic fidei,
Amoris hinc ignei
Aestuat caminus,

8b. Perferunt supplicia,
Quos amor per omnia
Penetrat divinus.

9 a. Hi sunt viri
Fide miri,
Viri fortes,
Quorum sortes
Regna tenent caelica.

9 b, Gaudent ita
Vera vita,
Ut fideli
Deo caeli

Nova canant cantica.

10 a. Qui se ipsos negaverunt
Et pro Christo pertulerunt
Tormenta fortissime,

10b. Holocausta medullata,
Fide multa concremata,
Offerunt gratissime.

11a. Reddant vota mente tota
Corde mero Deo vero
Perenni cum iubilo,

11b. Ubi Rachel, non iam Lia,
Non est Martha sed Maria,
Dies sine nubilo.

12 a, Vos precamur, testes Dei,
Natos lucis et diei
Decoratos gloria,

12 b. Ut nos ibi iam ascribi
Cum beatis faciatis
In Christi militia.