265. De sancto Micliaele.

1 a. Decantemus congaudentes
Pretiosam recolentes
Angelorum gloriam,

1b. Qui virtute deitatis
Intuentur trinitatis
Unicam substantiam.

2 a. Super omnem creaturam
Rector fecit hanc naturam
Rerum ab exordio;

2 b. Legislator ut narravit,
Hi sunt caeli, quos creavit
Deus in principio.

3 a. Hi ministrant deitati,
Astant trinae unitati
Famulantes iugiter,

3 b. Pias laudes depromentes,
Omnes Deo decantantes
Sanctus, Sanctus pariter.

4 a. Inter quorum hymnos primus
Est, ad caelos per quem imus,
Michael archangelus,

4 b. Per quem ab Aegypto motus
Ad promissam terram totus
Pergit Dei populus.

5 a. Qui in templo sancto Dei
Sub figura sacrae rei
Iuxta aram cerneris,

5 b. Stans incensum habens multum,
Vapor huius hic ad vultum
Arcae novi foederis.

6 a. Sed ut tecta detegantur
Et in lucem producantur
Haec sacra mysteria:

6 b. Templum sanctum plebs es
Christi;
Ara, iuxta quam fecisti,
Cordis conscientia;

7 a. Aurum, in quo sunt incensa,
Mens est prudens et succensa
Per divinum spiritum;

7 b. Scandens fumus incensorum
Piae preces sunt iustorum,
Quos fers ante Dominum.

8 a. Servus agens, cuius ore
Rapis praedam, fit honore
Insignitus gemino ;

8 b. Plebis Christi cor et sensum,
Templum, aram et incensum
Offers totum Domino.

9 a. Ergo, signifer polorum,
Pie princeps angelorum,
Duc ad caeli gaudia

9 b. Nos devote celebrantes
Pias laudes et psallentes
Tua patrocinia.