267. De sancto Nicasio.

1 a. Audi, martyr inclite,
Et exaudi debitae
Laudis sacrificium.

1b. Audi, praesul optime,
Vota mentis intimae
Et affectus cordium.

2 a. Ave, pater patriae,
Foenerator gratiae
Talento multiplici.

2b. Ave, pastor ovium,
Pastoris officium

Modo complens triplici.

3 a. Tu es gregis masculus,
Tu es dexter oculus
Rhemensis ecclesiae.

3 b. Tu es gregis speculum
Gregis mundans oculum
Exemplo munditiae.

4 a. Te pastore praevio
Currit grex in stadio
Ad palmam victoriae.

4 b. Tuae mortis pretio
Cessat indignatio
Divinae iustitiae.

5 a. Ergo, pacis hostia,
Pande nobis ostia
Divinae clementiae.

5 b. Tua prece praevia
Fiat nobis pervia
Verae via veniae.