268. De sancta Oda.

1 a. Christo plaude,plebsmundata,
Oda gaudet odis data
Castitatis lilio,

1b. Quae sub die hodierno
Sanctis pie in superno
Sociatur solio.

2 a. Scotis rege virgo nata

Christi lege est renata

Sacro fonte gratiae,

2 b. Visu caret oculorum,
Luce claret meritorum
Tempore infantiae.

3 a. Servitute servulorum
Ducta tute ad Gallorum
Pervenit confinium,

3 b. Pro salute oculorum
Spe virtute beatorum
Petiit Leodium.

4 a. In aperto Deo dante
Et Lamberto suffragante
Visum sumpsit oculis.

4 b. Carnis vultu speciosa,
Dei cultu gloriosa
Fidem firmat populis.

5 a. Spreto thoro coniugali
Cupit choro virginali
Vivere in gloria,

5 b. Mundi florem et ornatum,
Genitorem, dominatum
Deserit cum patria.

6 a. Tendens mente ad divina
Se sub gente Thessandrina
Imponit tugurio,

6 b. Corpus terit, cor confortat,
Hostes ferit et reportat
Triumphum de vitio.

7 a. Post mortalis vitae cursum
Ad vitalis regni sursum
Transfertur fastigia;

7 b. Multis modis haec afflicta

Oda odis est addicta

Virginum laetitia.

8 a. Christo caelis coronata,
Terra melis frequentata
Colitur christicolis,

8 b. Aegris dona sanitatis
Dat matrona pietatis,
Terrae salus incolis.

9 a. Vitam prece, Oda, munda,
Mundi faece ab immunda
Munda nos clementia,

9 b. Ut solvemur ab his malis
Et laetemur aeternalis
Luminis praesentia.