271. De sancto Pantaleone.

1 a. Quam aeternis dignam donis
Fecit dos Panthaleonis,
Gaude, Nicomedia,

1b. In qua natus est et passus
Per virtutum martyr passus
Vectus ad caelestia.

2 a. Claris puer ortus avis
Mansuete simplex avis
Servat innocentiam,

2 b. Nec dimittit hanc adultus,
In crescente Dei cultus
Crescit augens gratiam.

3 a. Generosi nitor vultus
Puritate mentis fultus
Puerum irradiat,

3 b. Rubet genis, flagrat fide,
Per quam vires homicidae
Frangit et humiliat.

4 a. De carnali medicina
Transit sacer ad divina
Medicus remedia

4 b. Et infirmos curat gratis,
Quos emunctos Hippocratis
Laeserant auxilia.

5 a. Mira virtus est medentis,
Morbos enim fagat mentis
Pariter et corporum,

5 b. Passim pascit indigentes,
Cibo corpus, verbo mentes,
Pastor Dei pecorum.

6 a. Rerum heres paternarum
Herus potens fit earum
Pater factus pauperum,

6b. Mundo carne conversatur
Et anhelat et levatur
Cor ad alta liberum.

7 a. Surgit puer hoc iubente,
Qui percussus a serpente
Mortis iugo suberat;

7 b. Serpens crepat, caecus videt,
Spernit deos et irridet
Surgens, qui languerat.

8 a. Et exsultat martyr factus,
Sed desaevit ira tactus
Imperator acrius.

8 b. Igni sanctus applicatur,
Vigor cuius annullatur
Actus sui nescius.

9 a. Meritorum huic testis
Et coronae vox caelestis
Fit ex novo nomine,

9 b. Opem Dei miserentis
Ei spondens in tormentis
Et poenarum turbine.

10 a. Ad laedendum laetus lenta
Transit martyr per tormenta
Superans divinitus,

10 b. Pugil fortis et insignis,
Qui virtutem vincit ignis
Igne sancti spiritus.

11a. Isti mare cedit viro,
Saxi moles motu miro
Super undas vehitur;

11b. Lac propinat iugulatus,
Per quod serto laureatus
Virginali noscitur.

12 a. Primo caedi nescit ense,
Per secundum adit mensae
Caelitum convivia:

12 b. Quem qui pie veneramur,
Eo duce perfruamur
Eorundem gloria.