274. De sancto Petro.

1 a. Petrus sequens Dominum
Fit piscator hominum,
Fit retium laxator,

1b. Hinc praefertur ceteris
Claviger ut aetheris
Et culpae concionator.

2 a. Dum duodecim gregantur
Et apostoli vocantur,
Hic est primus canone.

2 b. Verbum, quod se carne celat,
Pater, non caro revelat
Neque sanguis Barionae.

3 a. Ex hoc Petrus appellatur
Et ecclesiae locatur
Fundamentum,
Spernens ventum,

Spernens portas inferi.

3 b. Vidit se transfigurantem
Et secretius orantem,
Suscitatam
Videt natam

Intra domum Iairi.

4 a. Pro se Petrus ut pro Christo
Censum solvit, ut in isto
Declaret se vicarium.

4 b. Calcat mare, ter amorem
Fassus diluit priorem
Negandi sic ternarium.

5 a. Vitae Dorcadem dat piam,
Morte punit Ananiam,
Damnat trucem simoniam,
Baptizat Cornelium.

5 b. Ab Herode carceratus
Et ab angelo laxatus
Antiochiae praelatus
Turbis est fidelium.

6 a. Hinc Romanas arces adit,
Simon cum Nerone cadit;
Versa cruce
Petrus duce

Se minorem praedicat.

6 b. Ergo, Simon Petrus, Cephas,
Caelos pandat laxans nefas;
Umbra quippe
Sua lippae

Mentis morbos medicat.

7 a. Et nos tuas oves, Christe,
Quas pastor suscepit iste,
Tibi reddat caelitus,

7 b. Ut locetur intra caulas
Et caelestis patris aulas
Civis et proselytus.