281. De sancta Petronilla.

la. Ave, sponsa Christi vera,
Ave, mitis et sincera,
Ave, virgo Deo digna,
Christo prece me consigna.

Preces audi, praesta votum,
Cor in bono fac immotum.

1b. Confer inibi cor contritum,
Rege visum et auditum,
Rege gustum et olfactum,
Virgo sancta, rege tactum,

Ut in cunctis te regente
Vivam Deo pura mente.

2 a. Tutum mihi fer ducatum,
Plasmatorem fac placatum,

2b. Esto mihi consolatrix,
Pro me sis interpellatrix.

3 a. Christum pro me interpella,
Salva mortis de procella,

3 b. Superare fac me mundum,
Ne demergat in profundum.

4 a. Ne me sinas naufragari
In peccatis in hoc mari.

Virgo Dei, nunc memento,
Quo labore, quo tormento
Regnum Dei meruisti
Et sic caelos ascendisti.

4 b. Potens in conspectu Dei,
Memor esto, precor, mei,

Memor esto supplicantis,
Memor esto, quod in tantis
Sim peccatis constitutus,
Multis malis involutus.

5 a. Visita tu me infirmum

Et in bonis fac me firmum.

5 b. Agonista Dei fortis,

Esto praesens hora mortis,

6 a. Occumbentem fove, leva
Et de morte solve saeva,

6 b. Ut resurgam novus homo,
Civis in caelesti domo.

7 a. Duplex mors ne me infestet ;
Iesus Christus illud praestet

7 b. Tua prece exoratus,
Idem pater, idem natus,

8. Idem utriusque flamen,
Qui vivit et regnat. Amen.