285. In festo sanctorum Pontificum Traiectensium.

1 a. Iucundemur ad tantorum
Laudes patrum beatorum,
Quorum de consortio

1b. Tota trinitas resultat,
In caelestibus exsultat
Alma pacis visio.

2 a. Diaphanitas superna
Luce claret ab aeterna
Plenis fulta radiis ;

2 b. Urbs hymnizet Traiectensis,
Horum caelitus impensis
Freta iam praesidiis.

3 a. Vere felices proceres,
Qui veteris degeneres
Actus necarant hominis,

3 b. Virtutum[que] opifices,
Vecti ad divos apices
Raptu divini luminis.

4 a. Assunt nobiles ierarchae,
Egenorum patriarchae,
Potestates aulicae,

4b. Agni vere commensales,
Assertores cardinales
Veritatis unicae.

5 a. Quorum memoriale
Diutinum

5 b. Floret immortale
Apud Dominum.

6 a. O quam laudabilis,
O quam amabilis
Est haec societas!

6 b. Cui nulla taedia
Occurrunt nec saucia
Mentis anxietas.

7 a. Ubi merces est fidelis
Deus omnium in caelis,
Omnia in omnibus,

7 b. In quo praemiantur isti

Facti coheredes Christi

In supernis montibus.

8 a. Hoc primus de collegio
Servatius in praemio
Inthronizatur regio.

8 b. Sagacis vir ingenii,
Amandus huius praemii
Non expers est collegii.

9 a. Pii patres et pastores,
Memores mediatores

9 b. Sitis derelicti gregis

In conspectu summi regis.