286. De sancto Prosdocimo.

1 a. Pangat chorus, ut est moris,

Festa colens confessoris

Annua Prosdocimi,

1b. Quem ad sui conditoris
Regna traxit vis amoris
Et affectus intimi.

2 a. Nomen ei recte datur,
Per quod Deo designatur
Redditus pro decima ;

2b. Nec non totus immolatur,
Cuius igne concrematur
Caro, mens et anima.

3 a. Stirpe clarus et natura,
Sacri fontis genitura
Clarior efficitur,

3 b. Cor depurat fides pura,
Et immundi mundi cura
Caeli zelo vincitur.

4 a. Hunc honore praesulari
Petrus iubet sublimari
Destinatque Paduam;

4b. Rete missus infert mari,
Verbo capit salutari
Gentem fide vacuam.

5 a. In ingressu civitatis
Morbo diu mancipatis
Praebet opem miseris,

5 b. Donis laxans duplicatis
Per baptismum innovatis
Culpae vincla veteris.

6 a. Fama crescit, Paduanus
Stupet rex Vitalianus,
Qui languori suberat,

6 b. Christo credit et fit sanus,
Dum abiurat, quos paganus
Antea coluerat.

7 a. Uxor eius Praepedigna
Fit ancilla Christi digna
Spretis credens idolis ;

7 b. Sic ad lignum currunt ligna
Et erumpit inter signa
Novae fructus subolis.

8 a. Regis proles et regina
Sub hoc patre se Iustina
Summo regi dedicat,

8 b. Quae dedignans esse Dina
Cadit ense, quam divina
Virtus caelis applicat.

9 a, Patris huius medicina
Este, Feltris et Altilia
Surgunt et Vincentia,

9 b. Ac in urbe Tervisina
Luce frui gaudet bina
Euphrosina filia.

10 a. Fit eidem civitati
Restituta sanitati
Speculum Theodora,

10 b. De qua cives admirati
Sua firmant immutati
Fide Christi pectora.

11a. Fide pollens et decora,
Tuum effer et honora
Genitorem, Padua,

11b. Per hunc tibi supplex ora
Post dirupta carnis lora
Vitae dari pascua.

12 a. Tibi, pater, supplicamus,
Tibi laudes cumulamus,
Pontifex Prosdocime,

12 b. Ne nos trahat hostis hamus,
Te tutorem sentiamus
Corporis et animae.