288. De sancto Raimundo.

1 a. Profitemur conditorem,
Veneremur redemptorem
Sub canoro iubilo,

1b. In sese quam sit mirandus
Et in sanctis commendandus,
Res inspecta praedicat.

2 a. En, praesentis lux diei
Celebris in servi Dei
Agitur memoria ;

2 b. Hic est lapis pretiosus,
Claritate radiosus,
Virtutum sacrarium.

3 a. Hic Raimundus nuncupatus,
Sanctitate cunctis gratus,
Plenus caeli munere,

3 b. Nomen Christi venerandum
Cunctis proponit amandum
Signis et virtutibus.

4a. Caeci vident, claudi currunt,
Tumulati iam resurgunt
Virtute mirifica,

4b. Omne genus aegrotorum,
Turba omnis egenorum
Persentit praesidium.

5 a. Qualis, quantus sit Raimundus,
Quibus donis sit fecundus,
Caelum, terra, maria,

5 b. Dum oboediunt, loquuntur
Et ad nutum obsequuntur
Tanti viri gratia.

6 a. Bonis cunctis cumulatus
Est ad superos vocatus
Operum pro merito;

6 b. O Raimunde, da fervorem,
Ut ad caelestem decorem
Aspiremus pariter.