294. De sancta Scholastica.

1 a. Scholasticam collaudemus,
Christo laudes decantemus
Semper cum lactitia,

1b. In aetate quae puella
Cuncta vicit carnis bella,
Blanda mundi fortia.

2 a. Ordinata caritate,
Virginali puritate,
Velut rosa floruit,

2 b. Ardens intus caritate,
Foris fulgens honestate
Instar solis radii.

3 a. Sacris instans documentis,
Consolator mundae mentis
Hanc solatur saepius,

3 b. Cum virtutum indefessum
Benedicti figit gressum
Imbris vehementia.

4 a. Caeli gemmam singularem
Hanc provexit ad honorem
Rex aeternae gloriae.

4 b. Inter astra collocata
Ut columba dealbata
Caeli subit moenia.

5 a. Inter quinque sapientes
Puellas hanc reponentes
Veneremur laudibus.

5 b. Laude lucet trabeata
Scholastica, Christo grata
Ob virtutum studia.

6 a. Sacer grex sanctorum gaudet
Caelestique laude plaudet
De virginis gloria ;

6 b. Angelorum consors facta,
Virgo prudens, nos adapta
Christo Dei filio.

7 a. Supplicamus, nos tuere
Et peccata fac timere,
Mater bona, confer vere
Tempus indulgentiae.

7 b. Mater bona, crimen tege,
Victum dona, mores rege,
Ne damnemur gravi lege
Causa neglegentiae.

8 a. Eia, mater, nos agnosce,
Libro vitae nos deposce,
Cum electis inseri,

8 b. Ut consortes tuae sortis
Et a poenis et a portis
Eruamur inferi.