296. De sancto Sebastiano.

1 a. Adest dies celebris

Sebastiani, crebris

Intendamus laudibus,

1 b. Qui contemptis idolis

Bonae puer indolis

Claruit virtutibus.

2 a. Nobilis prosapiae

Narbonensis patriae

Sanctum Sebastianum

2 b. Transtulit emerita

Militia et vita

Clara Mediolanum.

3 a. Christianum militem,

Christi sequens tramitem,

Militari

3 b. Tegebat sub chlamyde,

Pugnae vacans fervide

Saeculari.

4 a. Hic in regis curia

Praefuit industria

Ceteris proceribus,

4b. Officium sedulum

Christo dans et pabulum

Geminum martyribus.

5 a. Sanctos Dei milites

Marcum et Marcellianum,

Potentes et divites

Secundum statum mundanum,

5 b. Immenso certamine

Tormentorum fatigatos

Firmo consolamine

Fide fecit roboratos.

6a. Huiccontemptummundanorum

Praedicanti paganorum

Coram multitudine

6 b. Adest Christus, rex caelorum,

Choro saeptus angelorum

Et caelesti lumine.

7 a. Hunc ut sibi confoederet

Osculo pacis allicit,

Et librum, in quo legeret,

Angelus ei obicit:

7 b. Zoe, quam gravis fecerat

Infirmitas esse mutam,

Angelus visus dederat

De lingua solvenda tutam.

8 a. Tunc indicit silentium

Manu tumultuantibus

Confidenter,

8 b. Et sanctus linguae vitium

Purgat suis precibus

Evidenter.

9 a. Quod sanata sit, indicat,

Cum laudes Christi praedicat

Et sancti constantissime ;

9b. Tunc vir eius Nicostratus

Veniam petit prostratus

Ad terram devotissime.

10 a. Tunc baptismali lavacro

Abluitur fonte sacro

Cum tota familia.

10 b. Dat pueris ulceroso,

Paralitico, gibboso

Duo beneficia.

11a. Idola Chromatii

Non obstante filii

Impetu Tiburtii

11b. De sua sollicitus

Salute cordicitus

Comminuit penitus.

12 a. Sanus currit tangere

Volens in itinere

Sanctum Dei nuntium,

12 b. Sed eum prohibuit,

Quia nondum habuit

Baptismi suffragium.

13 a. Hos instructos in Dei

Rudimentis fidei

Polycarpus baptizat,

13 b. Et miles emeritus

Laudes Dei caelitus

Intentus praeconizat.

14 a. Imperatori delatus

Et graviter accusatus,

Quodfidem Christi sectatur.

14 b. Se constanter christianum

Et idolorum profanum

Ritum esse protestatur.

15 a. Carnifices ad stipitem

Palam sacratum militem

Ligaverunt atrociter

15 b. Nequissima sententia;

Nam pro salute regia

Deum rogabat iugiter.

16 a. Tunc nequitiae ministri

Iussu impii magistri

Arcus aptant velocius

16 b. Et sanctum reddunt consutum

Sagittis atque hirsutum

Ut est spinis ericius.

17 a. Tunc recedunt, quia credunt

Fatue

Ipsum morti traditum.

17 b. Venientis et videntis

Viduae

Palpitantem spiritum

18 a. Deponitur officio,

Et eidem corde pio

Exhibuit opera

Misericordiae

Et pietatis ;

18 b. Qui in membris et corpore

Sanatus brevi tempore

Exsecratur scelera

Imperatoriae

Crudelitatis.

19 a. Tunc super hippodromium

Ibi iuxta palatium

Laceratur crudeliter.

19 b. Sanctum emisit spiritum,

Ad cuius cantant exitum

Angeli sancti dulciter.

20 a. In cloaca aduncatur

Corpus sacrati militis.

Ne ut martyr habeatur

Venerandus pro meritis.

20 b. Tunc per sanctum admonitae

Lucinae, matri inclitae,

Diligenter fuit curae

Illud dare sepulturae.

21a. Cessat morbus, cessat pestis

Altari aedificato.

21b. Sancte martyr, Christi testis,

Pro nobis Deum orato,

22 a. Ut cesset epidemia,

Qua flagellatur patria,

22 b. Et cum misericordia

Currat Dei sententia,

23 a. Finitaque miseria

Huius labentis saeculi

23 b. Tecum simus in gloria ;

Dicamus Amen singuli.