300. De ss. Simone et Iuda.

1 a. Ecce, dies praeoptata,

Dies felix, dies grata,

Dies digna gaudiis.

1b. Nos hanc diem veneremur
Et pugnantem admiremur
Christum in apostolis.

2 a. Simon et Iudas incliti,
Mariae Cleophae nati,
Extolluntur hodie ;

2 b. O germen vere nobile,
Propinqui regis gloriae
Et nepotes Mariae.

3 a. Hi celsi Dei famuli,
Digni Christi apostoli
Iverunt in Persidem,

3 b. Iesum Christum annuntiant
Duosque magos superant,
Arphaxat et Cosroem.

4 a. Sicque rege baptizato
Populoque emundato
A falsis simulacris

4 b. Ecclesiam iam ordinant
Et provinciam visitant
Purgatis idolatris.

5 a. Tandem magi nequam, ficti,
Ab apostolis devicti,
Concitant pontifices,

5 b. Qui nefandi, turpes, rei.
Hos cultores veri Dei
Coronant in martvres.

6 a. Quaesumus, caeli proceres,
Olympi cives nobiles,
Servulos respicite,

6 b. Qui tot malis irretiti
Non valemus sic reniti,
Precibus succurrite.

7 a. Iesu pie, Iesu bone,
Nostro nobis in agone
Largire victoriam,

7 b. Mores nostros sic compone,
Ut perpetuae coronae
Mereamur gloriam.