308. De sancta Theodora.

1 a. Romana propagine
Re Clemens et nomine
Terris claro lumine
Nitet caelo,

1b. Dilectus gentilibus,
Iudaeis fidelibus
Condescendit omnibus
Christi zelo.

2 a. Theodora stemmate
Pollens eius dogmate
Gaudet in baptismate
Renovari.

2 b. Sponsam sponsus sequitur
Et Clemens impetitur,
Trans pontum proscribitur
Relegari.

3 a. Hic exsul a consule
Fines intrat insulae
Coetu plenos exsule
Christiano.

3 b. Ipso gaudent imbui
Cuncti, cum promiscui
Sexus aegros statui
Reddat sano.

4 a. Ad agni vestigium
Ab excelso montium
Manat rivus fontium
Per te, Clemens.

4b. Idolorum corpora

Dum frangis, in aequora
Te iactat cum ancora
Iudex demens.

a. Siccatur ad spatium
Trium miliarium
Mare per septendium
Tua nece.

5 b. Rogo, tot miraculis
Insignis et titulis,
His subveni servulis
Tua prece.